البيت اللي كان بالمنام بقلم وشاعر البسطاء سعيد سعيد امام

 

البيت اللي كان بالمنام 

بقلم الكاتب وشاعر البسطاء سعيد سعيد امام

كان لينا بيت صغير وبابه مفتوح للجيران وكانت ضحكة أمي فيه تساوي كنوز الزمان وأبويا يرجع من شغله ويحضننا بكل حنان ونتلم حوالين طبلية ونحمد ربنا ع الأمان

كان الرغيف يتقسم علينا ويكفي كل جعان وكانت لقمة من إيد أمي أحلى من أكل السلطان واللي يغيب ساعة عن البيت نسأل عليه بلهفان واللي يزعل نراضيه قبل ما ينام زعلان

كبرنا واتفتحت لينا في الدنيا ألف باب 

وكل واحد جري ورا حلمه وساب وراه الأحباب

 واحد بنى بيت بعيد وواحد خدته الأسفار وواحد نسي إن ليه إخوات وبيت مفتوح ليل نهار

وأبويا قاعد ع المصطبة مستني صوت الخطوات يبص للباب كل شوية ويسأل عن اللي فات يقول يمكن النهارده يجوا ونرجع تاني للمة وأمي تقول معلش يا راجل دول مشغولين في الغمة

عدت سنين واتغيرت حتى ملامح المكان والبيت اللي كان مليان ضحك بقى ساكنه الحرمان الحيطان لسه فاكرة صوتنا ولعبنا في كل مكان والباب لسه مستني إيد تخبط عليه بحنان

وفي يوم رجعت لبيت أبويا بعد غياب طويل لقيته قاعد جنب الشباك وشعره بقى زي الليل لكن بياضه غطى راسه والتعب بان في العيون وأمي بتداري دموعها وتقول الحمد لله يا حنون

حضنت أبويا لقيت جسمه بقى خفيف في حضني والراجل اللي كان بيشيلني بقى محتاج اللي يسندني بص في عيني وقال يا ابني البيت من غيركم خراب مهما بنيتوا قصور في الدنيا ما تنسوش بيت الأحباب

ساعتها حسيت إن العمر سرق مننا أحلى سنين وإن الفلوس مهما تزيد ما تشتريش حضن الحنين وإن اللي يبيع لمة أهله يخسر كنوز العالمين وإن البيت مش بالطوب وحده البيت بقلوب ساكنين

جمعت إخواتي في ليلة وقلت لهم كفاية غياب تعالوا نرجع لبيت أبويا ونفتح من جديد الأبواب نقعد ونضحك زي زمان وننسى تعب المشوار ونخلي صوتنا يرجع تاني ينور عتمة الدار

ولما اتلمينا حوالين أبويا شفت الفرحة في العيون وأمي دعت لنا من قلبها وقالت يا رب دايما مجموعين وأبويا قال دلوقتي بس رجعتلي روحي من جديد مافيش أغلى من لمة عيالي حتى لو العيش قليل

يا كل واحد خدته الدنيا ونسى أهله والديار ارجع قبل ما العمر يعدي وتندم بعد فوات المشوار ما تستناش لما يغيبوا وتفضل تبكي ع الصور ده اللي بيضيع حضن أهله مهما يكسب خسر

البيت مش حيطان وسقف ولا باب عليه مفتاح البيت حضن بيضمنا لما نتعب من الجراح البيت دعوة أم صافية ووش أب مليان سماح واللي لسه ليه أهل عايشين عنده من الدنيا جناح

يا رب ما تحرمش بيت من لمة الأحباب ولا تخلي الغربة تسرق من قلوبنا صوت الأصحاب وخلي كل ابن فاكر إن العمر مهما طال قصير وإن اللي يسيب حضن أهله يخسر في الدنيا كتير

وآخر كلامي لكل قلب خدته الدنيا بعيد ارجع لبيتك قبل ما ييجي يوم ما تلاقيش فيه حد جديد يمكن تلاقي الباب مقفول والحيطان بتبكي في سكات وتعرف إن أغلى كنز في الدنيا كان لمة ناس راحت وماتت

بقلم الكاتب وشاعر البسطاء سعيدسعيدامام